Articles

இதயத்தைக் கடிக்கும் காய்ச்சல்

முழங்கால் மூட்டில் வலி மற்றும் வீக்கத்தோடு காய்ச்சல் ஏற்படும். முதலில் ஒரு மூட்டில் வலி வந்து அடுத்த நாள் வலி குறைந்து வேறு மூட்டில் வலி. அத்துடன் காய்ச்சல். இத்தகைய காய்ச்சலுக்கு ருமாடிக் காய்ச்சல் எனப்பெயர். இந்த காய்ச்சலின் போது மூட்டுவலி ஏற்பட்டாலும் மூட்டுகளை அதிகமாக பாதிப்பதில்லை. ஆனால் மறைமுகமாக இதயத்தின் மூன்று அடுக்குகளின் உள்பகுதியான எண்டோகார்டியம், நடுப்பகுதியான மையோ கார்டியம், வெளிப்பகுதியான பெரிகார்டியம் இம்மூன்றுமே பாதிப்படைகின்றன.

பல சமயங்களில் பாதிப்புகள் அதிக மில்லாமல் முற்றிலும் குணமாகிவிட்ட நிலையே காணப்படும். ஆனால் அமைதியாக இதயத்தில் வால்வுகளைப் பாதித்துவிடும். அதில் முக்கியமாக மைட்ரல் வால்வு, அடுத்ததாக அயோர்டிக் வால்வு,. இறுதியாக ட்ரைகஸ்பிட் வால்வு என பாதிப்பு ஏற்படும்.

பெரும்பாலோருக்கு ருமாடிக் காய்ச்சலில் மைட்ரல் வால்வுதான் அதிகமாக பாதிக்கப் படுகின்றன. அதனால் அக்காய்ச்சலை இதயத்தைக் கடிக்கும் காய்ச்சல் என்பர்.

இக்காய்ச்சலுக்கு காரணம் ஸ்ட்ரெப்டோ காக்கஸ் என்ற பாக்டீரியா, தொண்டை கரகரப்பு அல்லது டான்சில் தொல்லை என ஆரம்பித்து இரத்தத்தில் அதன் பாதிப்பு ஏற்பட்டு இறுதியாக இதயத்தைத் தாக்குகிறது.

பெரும்பாலும் இப்பாதிப்பு ஏற்பட்ட பத்து அல்லது பதினைந்து ஆண்டுகளுக்குப் பின்னரே இதய பாதிப்பின் அறிகுறிகள் வெளிப்படும்.

மைட்ரல் வால்வு சுருங்கி விட்டால் நுரையீரலிருந்து இதயத்தின் இடது பகுதிக்கு செல்ல வேண்டிய ரத்தம் தடுக்கப்பட்டு நுரையீரலில் இரத்தத்தின் அழுத்தம் அதிகமாகி மூச்சுத்திணறல் ஏற்படும்.

ஆரம்பத்தில் கடுமையான வேலையின் போது ஏற்படுகிற இந்த மூச்சுத் திணறல் மேன்மேலும் அதிகமாகி இயல்பான வேலையின் போதும் உண்டாகும். பிறகு நாளடைவில் ஒருசில அடி நடந்தாலே மூச்சுத் திணறும். நோய் முற்றினால் படுக்கையிலிருக்கும்போதே மூச்சுத் திணறும்.

ருமாடிக் காய்ச்சல் வந்தால் அதற்கு முறையான பரிசோதனைகளான ASO அளவு இ.சி.ஜி மற்றும் எக்கோ பரிசோதனைகளையும் செய்தால் அதை சரியாக தீர்மானிக்கலாம்.

ருமாடிக் காய்ச்சல் என்பதை உறுதிபடுத்திவிட்டால் மூன்று வாரத்திற்கு ஒருமுறை பெனிடியூர் என்ற பென்சிலின் ஊசியைப் போட்டால் அதனால் ஏற்படுகின்ற இதய பாதிப்பை தவிர்த்துவிடலாம். அந்த ஊசியை சுமார் பத்தாண்டுகளோ அல்லது மருத்துவரின் ஆலோசனைக்கேற்பவோ தொடர்ந்து போட வேண்டும்.

எலிக் காய்ச்சல்

  • எலிக் காய்ச்சல் என்ற நோய் சாதாரண காய்ச்சலாகவோ மிகக் கடுமையான காய்ச்சலாகவோ ஏற்படலாம்.
  • கல்லீரல்/ சிறுநீரகத்தைத் தாக்கி உயிருக்கே ஆபத்துகூட எற்பட செய்யலாம்.
  • வீல்ஸ் (மஞ்சள் காமாலை) என்றமிக மோசமான வியாதியும் இந்தக் கிருமியால்தான் எற்படுகிறது.
  • எலிக் காய்ச்சல் விலங்குகளிடம் இருந்து மிகவும் அதிகமான அளவில் மனிதர்களுக்குப் பரவுகிறது.
  • இந்த நோய், வெப்பம் அதிகமாக உள்ள நாடுகளில் அதிகம் ஏற்படுகிறது.
  • மழைக்குப் பிறகு ஏற்படும் வெள்ளப் பெருக்கின்போது இந்த நோய் மிக வேகமாகப் பரவுகிறது.

வீட்டில் வளர்க்கப்படும் மாடு, ஆடு, நாய், பூனை, போன்ற விலங்குகளின் சிறுநீர் வழியாக இந்தக் கிருமி பரவுகிறது. விலங்குகள் புல்வெளியில் மேயும்போது சிறுநீர் கழிக்கின்றன. சிறுநீர் கலந்த அந்தப் புல்லைத் தின்னும் மாடு, ஆடு, பன்றி போன்றவற்றின் உடலுக்குள் கிருமிகள் நுழைகின்றன.

இப்படி நாய், பூனை போன்ற விலங்குகளுக்குப் பரவி அவற்றில் இருந்து மனிதர்களுக்கு இந்தக் கிருமிகள் தொற்றி நோயை  ஏற்படுத்துகின்றன.

நாய், எலி போன்றவற்றிடம் இருந்துதான்  குழந்தைகளுக்கு மிக எளிதில் இந்தக் கிருமி பரவுகிறது.

எலிகளின்  சிறுநீர் கலந்த மண் மற்றும் நீர் ஆகியவற்றுடன் தொடர்பு கொள்ளும் தொழிலாளர் களிடையே இந்த நோய் அதிகமாகக் காணப்படுகிறது. மீன் பிடித்தல் மற்றும் நீந்துபவர்களுக்கு இந்த நோய் ஏற்பட வாய்ப்பு உண்டு.

பரவும் முறை

நேரடியாகப் பரவுதல்

லெப்டோஸ்பைரா கிருமிகள், தோலில் உள்ள சிறு காயங்கள் மற்றும் உட்புற தோல் எனப்படும் சளிப்படலம் வழியாக உடலுக்குள் நுழைகிறது.

மறைமுகமாகப் பரவுதல்

நோயால் பாதிக்கப்பட்ட விலங்குகளின் சிறுநீர் கலந்த மண், நீர், காய்கறிகளைத் தொடுவதால் தோலில் உள்ள சிறு கீறல்கள், காயங்கள் வழியாக உடலுக்குள் கிருமிகள் செல்கின்றன.

நோய்க் கிருமிகள் இருக்கும் உணவு மற்றும் நீரை உட்கொள்வதாலோ நோய் ஏற்படும்.

விலங்குகளின் சிறுநீர் துளிகள் கலந்த காற்றைச் சுவாசிக்கும் போதும் ஆடு, மாடு, ஆகியவற்றில் பால் கறக்கும் போதும் நோய் பரவ வாய்ப்பு உள்ளது.

அறிகுறிகள்

கிருமிகள் உடலுக்குள் நுழைந்த 4 நாட்களில் இருந்து 20 நாட்களுக்குள் நோயின் அறிகுறிகள் தோன்றும். சாதாரணமாக பத்து நாட்களுக்குள் அறிகுறிகள் ஏற்பட்டு விடும்.

எலிக்காய்ச்சல் பெரும்பாலும் அறிகுறிகளே இல்லாமல் சரியாகிவிடும். இதனால் பாதிக்கப்பட்டவர்களில் மிகச்சிலரே மூளை பாதிக்கப்பட்டவர்களாகவோ அல்லது சிறுநீரகம், ஈரல் பாதிக்கப்பட்டவர்களாகவோ இருப்பார்கள்.

காய்ச்சல் இருவகையில் ஏற்படும் 

  1. மஞ்சள் காமாலை இல்லாத வகை 

ரத்தத்தில் நோய்க் கிருமிகள் பெருகும்போது அறிகுறிகள் ஏற்படும். காய்ச்சல், நடுக்கம், உடல் சோர்வு, தலைவலி, வாந்தி, உடல்வலி, நாடித்துடிப்பு குறைதல், குறைந்த ரத்த அழுத்தம் போன்றவை.

இவற்றுடன் தலைவலி, கால், முதுகு, வயிறு பாதிப்பு, கண்கள் சிவந்து போதல் மற்றும் கூசுதல், கண்களுக்கு பின்பக்கம் வலி, உடல் முழுவதும் நிணநீர் கட்டிகள் , கல்லீரல், மண்ணீரல் வீங்குதல், சிவப்பு நிறத் தடிப்புகள் போன்றவை ஏற்படும். தொண்டை வலி, நிமோனியா, மூட்டு வலி, இதய பாதிப்பு, விரை வீக்கம் போன்றவையும் ஏற்படும். மூளைக் காய்ச்சலும் ஏற்படும்.

  1. மஞ்சள் காமாலையுடன் கூடிய வகை 
  • முதலில் ஏற்படும் அறிகுறிகள், மஞ்சள் காமாலை இல்லாத எலிக்காய்ச்சல் போல் இருக்கும்.
  • மிக வீரியமான நிலையில் ரத்தம் உறையும் தன்மை குறைந்து ரத்தக் கசிவு ஏற்படும் நிலையில் இதயப் பாதிப்பு ஏற்படும்.
  • சிறுநீரில் ரத்தம், புரதம் மற்றும் காஸ்ட்ஸ் வெளியேறும்
  • சிறுநீரகம் செயலிழப்பு ஏற்படலாம்.
  • மூக்கில் இருந்தும் உணவுக் குழாயில் இருந்தும் ரத்தக் கசிவு ஏற்படலாம்.

பரிசோதனைகள் 

  1. மைக்கேராஸ்கோபிக் அக்ளுடினேஷன் (Microscopic agglutination test)
  2. எலீஸா பரிசோதனை
  3. பாலிமரேஸ் செயின் ரியாக்ஷன் பரிசோதனை
  4. இம்யூனோ ஃப்ளோரசன்ஸ் டெஸ்ட்
  5. இம்யூனோ கெமிக்கல் டெஸ்ட்

சிகிச்சைகள்

  • பென்சிலின்  (Pencillin G)
  • டெட்ராசைக்ளின்  (Tetracycline)
  • தொடர்ந்து ஏழு நாட்களுக்கு மருந்து கொடுத்தால் நோயின் தீவிரம் குறையும்.

நோய் தடுப்பு முறைகள்

  • சிறுநீர் கலந்த அசுத்தமான தண்ணீர் மற்றும் மண்ணைத் தொடக் கூடாது.
  • எலிகளைக் கட்டுப்படுத்த வேண்டும்
  • விவசாயத்திற்குப் பயன்படுத்தப்படும் விலங்கு களுக்கும், வீட்டில் வளர்க்கப்படும் விலங்குகளுக்கும் தடுப்பூசி போடவும்.
  • அடிக்கடி வெளியூர்களுக்கு பயணம் மேற்கொள்பவர்கள் டாக்சிசைக்ளின் மருந்தை வாரம் ஒருமுறை 200 மி.கி என்ற அளவில் எடுத்துக் கொள்ளலாம்.

சிக்குன்குனியா

சிக்குன்குனியா காய்ச்சல், சிக்குன்குனியா என்ற வைரஸ் கிருமியால் ஏற்படுகிறது. ஈடிஸ் ஈஜிப்டி என்ற கொசுவால் ஒருவரிடம் இருந்து மற்றவருக்கு இந்தக் கிருமிகள் மிக அதிக அளவில் பரவுகின்றன. கொசுக்களால் மட்டுமே மனிதர்களிடையே பரவுகிறது. சிக்குன்குனியா காய்ச்சலானது, பாதிக்கப்பட்டவரின் மூட்டுகளைத் தாக்கி முடக்குமே தவிர இறப்பை ஏற்படுத்தாது.

பரவும் முறை

கொசு மூலம் மட்டுமே பரவுகிறது. பெரும் பாலும் மழைக்காலங்களில்தான் பரவும். மனிதர்களின் வசிப்பிடங்களில் தேங்கும் தண்ணீரில் கொசுக்கள் இனப்பெருக்கம் செய்து பெருகின்றன.

நோய் அறிகுறிகள் :

காய்ச்சல், நடுக்கம், தலைவலி, வாந்தி, மூட்டு வலி மற்றும் வீக்கம், தோலில் சிவப்பு நிறத் தடிப்புகள், கண் கூச்சம் போன்றவை முக்கியமான அறிகுறிகள்.

காய்ச்சல் மூன்று நாட்களிலேயே குணமாகி விடும். ஆனால் மூட்டு வலி மற்றும் வீக்கம்  மட்டும் பல நாட்களுக்கு நோயாளியின் வயதைப் பொறுத்து ஒன்று முதல் மூன்று வாரங்களுக்கோ அல்லது பல மாதங்களுக்கோ நீடிக்கலாம்..

இந்த காய்ச்சலால் முதுகு வலி, கறுப்பு நிறவாந்தி, மூக்கில் ரத்தம் கசிதல், மூட்டு வலி போன்றவை ஏற்படும்.

கைவிரல் மூட்டுக்கள், மணிக்கட்டு, முழங்கை, முழங்கால், கணுக்கால், கால்விரல் மூட்டுக்களைத்தான் இந்தக் காய்ச்சல் மிக அதிகமாகத் தாக்கும்.

பரிசோதனைகள்

  • எலீஸா (Elisa)
  • HI (Heamagglutination Inhibition)
  • காம்ப்ளிமெண்ட் (CFT)
  • RT – PCR

சிகிச்சை

  • காய்ச்சல், மூட்டு வலி மற்றும் வீக்கத்தைக் குறைக்க பாரசிடமால் மருந்தைக் கொடுக்கலாம்.
  • ஆஸ்பிரின், ஸ்டீராய்ட் போன்ற மருந்துகளைப் பயன்படுத்தக் கூடாது.
  • சிக்குன்குனியாவால் பாதிக்கப்பட்டவர் களுக்கு நல்ல ஓய்வு தேவை. கை கால்களுக்கு மிதமான பயிற்சி கொடுப்பது நல்லது.

சர்க்கரை நோய்

உண்ணும் உணவை உடல் குளுகோஸாக (சர்க்கரை) மாற்றுகிறது. பிறகு அந்த சர்க்கரை, இரத்த ஓட்டத்தில் சேர்கிறது. கணையத்தில் சுரக்கின்ற இன்சுலினும் இரத்தத்தில் சேர்கிறது.

இதனால் சர்க்கரையானது அணுக்களின் உள்ளே செல்ல முடியும். பிறகு உயிரணுக்கள் சர்க்கரையை எரித்து, உடலுக்கு எரிபொருளை வழங்குகிறது. அதனால் தான் உடலுறுப்புகள் செயல்படுகின்றன.

சர்க்கரையானது உயிரணுக்களுக்குள் செல்ல முடியாதபோது, இரத்தத்திலேயே தங்கிவிடுகிறது. இதுவே அதிக இரத்த சர்க்கரை (நீரிழிவு நோய்) எனப்படும்.

முதல் வகை (டைப் 1 ) சர்க்கரை நோய்:

இவ்வகை சர்க்கரை நோயால் பாதிக்கப் பட்டுள்ளவர்கள், உயிர் வாழ இன்சுலின் ஊசி போட்டுக் கொள்வது மிகவும் அவசியம். இல்லை யென்றால் அவர்கள் (மயங்கிய நிலை) எனும் உயிருக்கே ஆபத்து ஏற்படுகின்ற நிலைக்கு போய் விடுவர். அதனால்தான் இது ‘இன்சுலின் சார்ந்துள்ள சர்க்கரை நோய்’ என்பர்.

இந்த நோய் பெரும்பாலும் இளம் வயதில் இருக்கும் போது ஆரம்பிக்கிறது என்றாலும், எந்த வயதினருக்கும் இந்த வகை நோய் ஏற்படலாம்.

இரண்டாம் வகை சர்க்கரை நோய்:

இவ்வகையில் இன்சுலின் உற்பத்தி சீராகவே உள்ளது. ஆனால் போதுமான அளவுக்கு உற்பத்தி செய்வதில்லை. அல்லது உற்பத்தி செய்யும் இன்சுலினை போதுமான அளவுக்கு உபயோகித்துக் கொள்வதில்லை. இவ்வகை சர்க்கரை நோய்க்கு சரியான உணவு, உடற்பயிற்சி, மாத்திரை அல்லது இன்சுலின் மூலம் சிகிச்சை அளிக்கலாம். பெரும்பாலும் 40 வயதிற்கு மேற்பட்டவர்களுக்கு ஏற்படும்.

அறிகுறிகள் :

இரண்டாம் வகை நோய்க்கு ஆரம்பத்தில் எந்த அறிகுறியும் தோன்றுவதில்லை. அவை படிப் படியாகத் தோன்றும்.

  1. சோர்வான உணர்வு, அசதி
  2. தோல் வறட்சி, அரிப்பு ஏற்படுதல்
  3. கைகள் (அடி) பாதங்கள்உணர்வு குறைந்து போதல்.
  4. கை, கால் நடுக்கம்.
  5. தொடர்ந்து ஆறாத புண், காயம் ஆறுவதில் தாமதம்.
  6. அடிக்கடி சிறுநீர் கழித்தல், அதிக தாகம், அதிக பசி, கண் பார்வை மங்குதல்.
  7. உடல் உறவில் குறைபாடு போன்றவை ஏற்படும்

ஜி.டி.டி பரிசோதனை :

பொதுவாக இரத்தப் பரி சோதனையில் இரத்த சர்க்கரை அளவு அதிகமாக இருந்தால் ஜி.டி.டி (குளுக் கோஸ் டாலரன்ஸ் டெஸ்ட்) செய்து சர்க்கரை நோய் இருக்கிறதா, இல்லையா என்பதை உறுதிபடுத்திக் கொள்வது அவசியம்.

ஜி.டி.டி பரிசோதனை என்பது மூன்று கட்டமாக மொத்தம் இரண்டு மணி நேரம் செய்யப்படுகிற ரத்த சர்க்கரை அளவு பரிசோதனையாகும்.

முதலில் வெறும் வயிற்றில் சர்க்கரை அளவு. அடுத்து 75 கிராம் குளுக்கோஸ் கலந்த நீரை குடிக்கக் கொடுத்து ஒரு மணி நேரம் கழித்து செய்யப்படுகிற ரத்த சர்க்கரை பரிசோதனை. அடுத்து இரண்டு மணி நேரம் கழித்து இரத்த சர்க்கரை அளவை பரிசோதனை செய்வது ஆகியவை.

ஜி.டி.டி இரத்தப் பரிசோதனை அளவுகள்

ஜி.டி.டி ரத்தப் பரிசோதனையில் வெறும் வயிற்றில் செய்யப்பட்ட பரிசோதனையில் ரத்த சர்க்கரை அளவு 120 மில்லிகிராமுக்கு அதிகமாக இருந்தாலே கணையத்தில் போதிய இன்சுலின் சுரக்கவில்லை என்று பொருள்.

இந்த நிலையிலேயே உணவுக் கட்டுப்பாடு, உடற்பயிற்சி ஆகியவற்றில் கவனம் செலுத்த தொடங்கி விட்டால் சர்க்கரை நோயைத் தடுக்கலாம்.

ஜி.டி.டி இரத்தப் பரிசோதனையில் இரண்டு மணி நேரம் கழித்து செய்யப்பட்ட சோதனையில் இரத்த சர்க்கரை அளவு 200 மில்லி கிராமுக்கு அதிகமாக இருந்தால் சர்க்கரை நோயை உறுதிப்படுத்தலாம்.

சிறுநீரக பாதிப்பு :

கண்களுக்கு அடுத்ததாக சிறுநீரகங்களை சர்க்கரை நோய் பாதிப்பதற்கான வாய்ப்புகள் அதிகம். சிறுநீரகங்களில் பாதிப்பு ஏற்பட்டால் ரத்த அழுத்தம் அதிகமாகும். எனவே சர்க்கரை நோயாளிகள் ரத்த அழுத்த அளவையும் இயல்பானதாக வைத்துக் கொள்வது அவசியம்.

எளிய சிறுநீர் பரிசோதனை மூலம் (மைக்ரோ அல்புமின் யூரியா சோதனை) சர்க்கரை நோயினால் சிறுநீரகங்களில் பாதிப்பு ஆரம்பித்துள்ளதைக் கண்டுபிடித்து விட முடியும். மருந்து சிகிச்சை மூலமே சிறுநீரக செயலிழப்பை தடுக்க முடியும்.

தொடர்ந்து ரத்த சர்க்கரை அளவை நல்ல கட்டுப்பாட்டில் வைத்துக்கொள்வது அவசியம். கால் வீக்கம் ஏற்பட்டால் சிறுநீரக செயலிழப்பின் அறிகுறி எனலாம்.

இதய பாதிப்பு :

உடலில் உள்ள கொழுப்பைப் பிரிக்கும் செயல்பாட்டிற்கு இன்சுலின் ஹார்மோன் உதவுகிறது.

உடலில் இரத்த சர்க்கரை அளவு அதிமாக இருந்தால் கொழுப்பு பிரியாமல் கெட்ட கொழுப்பு சத்து (எல்டிஎல் கொலஸ்ட்ரால்) அதிகமாகி. இரத்தக் குழாய்களை அடைக்கும். இதற்கு ‘அதிரோஸ்கிளிரோசிஸ்’ என்று பெயர். இதனால் சீரான இரத்த ஓட்டம் பாதிக்கப்படும். இதய ரத்த குழாய்களிலும் இத்தகைய பாதிப்பும் ஏற்படும்.

கட்டுப்பாடில்லாத சர்க்கரை நோய் காரணமாக, இதய நரம்புகள் பாதிக்கப் பட்டு வலி உணர்வைத் தெரிவிக்கும் ஆற்றலின் பாதிப்பு ஏற்படும். நோயாளியின் வயதைப் பொருத்து, ரத்த கொழுப்பு சத்து அளவுகள் அதிகமாக இருக்கும் நிலையில் இதயத்தைக் காக்கும் சிகிச்சையும் சேர்த்து செய்யப்படும்.

சரியான காலணி :

ஒரு சிலருக்கு கால் விரல்களின் நுனிப் பாதத்தில் குத்தல் அல்லது எரிச்சல், பஞ்சு மெத்தையில் நடப்பது போன்றஉணர்வு ஆகிய அறிகுறிகள் இருக்கும். கால் நரம்பு, ரத்த குழாய் பாதிப்பு காரணமாக இத்தகைய அறிகுறிகள் தெரியலாம்.

சர்க்கரை நோயாளிகளின் கால் நரம்பு ரத்தக்குழாயின் தன்மையை அறிய பரிசோதனைகள் உள்ளன. பாதத்தின் அழுத்தப் புள்ளிகளை ஆய்வு செய்து, எம்.சி.ஆர் (மைக்ரோ செல்லுலார் ரப்பர்) அல்லது எம்.சி.பி (மைக்ரோ செல்லுலார் பாலிமர்) சிறப்புக் காலணிகளை அணிவது நல்லது.

கட்டுப்படுத்தப்படாத சர்க்கரை நோயினால் கால் ரத்தக்குழாய்களில் அடைப்பு ஏற்படும். சர்க்கரை நோயைக் கண்காணித்து மருத்துவ ஆலோசனை பெறுவது, சர்க்கரை உள்ளவரின் குடும்பத்தினரின் ஒத்துழைப்போடு உணவுமுறை, உடற்பயிற்சிகளைக் கடைப்பிடிப்பது, மருந்துகளை சரியான அளவில் சரியான நேரத்தில் கொடுத்து விழிப்புடன் சர்க்கரையைக் கட்டுப்படுத்துவது ஆகியவை மிக முக்கியம்.

சர்க்கரை நோய், இரத்தக் கொதிப்பு, இதய நோய் உள்ளவர்களுக்கு இரத்தக்குழாயின் நிலையைப் பொருத்து சிகிச்சையும் மாறுபடும்.

ரத்தக்குழாய் அடைப்பு ஏற்படக் காரணங்கள்:

  • வயது ஆக ஆக இரத்தக்குழாய் சுருங்கி அடைப்பு ஏற்படலாம்.
  • பாரம்பரியம்
  • பெண்களை விட ஆண்களுக்கு ரத்தக் குழாய் அடைபடும் வாய்ப்பு அதிகம்.
  • புகைப்பிடித்தல்
  • அதிக இரத்த அழுத்தம்
  • அதிக கொலஸ்ட்ரால்
  • சர்க்கரை கட்டுப்பாட்டில் இல்லாதது
  • உடல் பருமன்
  • அதிகமாக மது அருந்துதல்

போன்ற காரணங்களில் இரண்டுக்கு மேல் இருந்தால் அவர்களுக்கு மாரடைப்பு ஏற்படுகின்ற வாய்ப்பு இருக்கலாம். இவர்கள் மாரடைப்பு தடுப்பு மருந்துகளைச் சாப்பிடுவது நல்லது.

சர்க்கரை உள்ளவர்கள் வருடத்திற்கு ஒரு முறை விழித்திரையில் பாதிப்பு உள்ளதா என்று பரிசோதனை செய்து கொள்வது அவசியம்.

உணவே மருந்து :

நீரிழிவு நோய் சிகிச்சை முறையில் உணவு கட்டுப்பாடும் உடற்பயிற்சியும் மிக முக்கியம். இக் கட்டுப்பாட்டினை செய்யாமல் உயர்ந்த ஊசி மாத்திரை சாப்பிட்டாலும் பலன் குறைவாக இருக்கும்.

அரிசி, கோதுமை, ராகி, பார்லி, மக்காச் சோளம் போன்ற அனைத்திலும் 70% மாவுச்சத்து உள்ளது. ஆகவே அவற்றை சரியான அளவில் உட்கொள்ளுதல் அவசியம்.

கலோரி குறைவாக அதே சமயத்தில் புரதம் அதிகமாக உள்ள உணவினை எடுத்துக் கொள்ள வேண்டும். பயறு, பருப்பு போன்றதாவரங்களிலிருந்து கிடைக்கின்ற நார்ச்சத்து தரமானவை யாகவும், சிறப்பானைவையாகவும் இருக்கும்.

நார்ச்சத்து மிகுந்த உணவு நீரிழிவு நோயைக் கட்டுப்படுத்தி கொலஸ்டிராலைக் குறைப்பதால், இயற்கையான நார்ச்சத்துள்ள உளுந்து, கொண்டைக்கடலை, பச்சைப்பயறு போன்றமுழு தானியப் பயறு வகைகள் மற்றும் கீரை வகைகள் எடுத்துக் கொள்ள வேண்டும்.

உணவில், கொழுப்பை குறைத்தால் இரத்தத்தில் கொலஸ்டிரால் அதிகமாவதையும் இரத்தக் குழாய்களில் அடைப்பு உண்டாவதையும் தடுக்கலாம். அந்த வகையில் சமையலுக்குப் பயன் படுத்தப்படுகின்ற எண்ணெய் மிக முக்கியம்.

தாவர எண்ணெய்களை குறைந்த அளவில் உபயோகிக்கலாம். ஆலிவ் எண்ணெய், நல்லெண்ணெய், சூரியகாந்தி எண்ணெய் போன்றவற்றை மாற்றி மாற்றி உபயோகித்தால் பலன் அதிகம்.

விரதம் இருப்பதை கண்டிப்பாகக் கைவிட வேண்டும். விருந்தும் தவிர்க்கப்பட வேண்டும்.

உணவையும் பல வேளைகளாகப் பிரித்து சிறு சிறு இடைவெளிகளில் உண்ணுவது நலம். உணவில் கலோரி அளவை குறைத்துக் கொள்ள வேண்டும். என்ன சாப்பிடுகின்றோம் என்பதைக் காட்டிலும் எவ்வளவு சாப்பிடுகின்றோம் என்பதுதான் முக்கியம்.

நீரிழிவும் கர்ப்பமும்

நீரிழிவு நோயால் பாதிக்கப்பட்ட பெண்களுக்கு குறைப் பிரசவத்தில் குழந்தைப்பேறு, கருச்சிதைவு, உடல் ஊனம், குழந்தை இறந்து பிறப்பது போன்ற சிக்கல்கள் இன்சுலின் உபயோகிப்பதால் தற்காலத்தில் குறைந்து விட்டது.

கருத்தரிப்பதற்கு முன்பும் கருவுற்ற பின்பும் சர்க்கரையின் அளவு கட்டுப்பாட்டிற்குள் இருக்க வேண்டும். கருத்தரிக்கும் காலங்களில் நோய்த் தொற்று சிறுநீரக பாதையில் ஏற்பட வாய்ப்புள்ளது.

குழந்தையின் வளர்ச்சியினை ஸ்கேன் செய்து பார்த்து மருத்துவரின் ஆலோசனைப்படி குழந்தையின் வளர்ச்சிக் குறைகளைத் தவிர்க்க வேண்டும்.

பிரசவத்திற்கு முன்பு நீரிழிவு நோய் இல்லாதவர்களில் சிலருக்கு பிரசவ காலங்களில் நீரிழிவு நோய் ஏற்பட வாய்ப்புண்டு, இது பெரும்பாலும் கருவுற்று 20 வாரங்களுக்குப் பிறகு ஏற்படக்கூடியது. பிரசவத்திற்குப் பிறகும் சர்க்கரையின் அளவை கண்காணித்துக் கொள்ள வேண்டியது அவசியம். பிரசவத்திற்குப் பிறகு இவர்களுக்கு இன்சுலின் தேவை குறைந்துவிடும். கர்ப்பத்தின் போது ஊசிக்கு பதிலாக மாத்திரையினை மாற்றக் கூடாது.

சிறுநீரில் கீட்டோன் இருக்கிறதா என்பதை வாரம் ஒருமுறை அல்லது இரண்டு வாரத்திற்கு ஒருமுறை பார்க்க வேண்டும். கீட்டோன் இருந்தால் தேவையான சத்தி உணவில் கிடைக்கவில்லை என்று பொருள்.

கர்ப்பத்தில் உடல் எடை

வாரத்திற்கு 0.2 கிலோ எடை அதிகரிக்கலாம். இந்த எடை அதிகரிப்பு மெதுவாகவும் படிப்படியாகவும் இருக்க வேண்டும். திடீரென்று அதிக எடை இருந்தால் பரிசோதனை அவசியம்.

உணவு :

உணவுக் கட்டுப்பாடு மிகமிக அவசியம். காய்கறிகள், கீரை தானிய வகைகளை உணவில் சேர்த்துக் கொள்ளவும்.

உடற்பயிற்சி :

மிதமான உடற்பயிற்சி சர்க்கரையை குறைப்பதற்கும் குழந்தை வளர்ச்சிக்கும் மிக முக்கியமானது. நன்றாக நடப்பது. வீட்டில் சிறு சிறு வேலைகளைச் செய்வது நல்லது.

நோய் உள்ளவர்களுக்கு மாத்திரையுடன் சேர்த்து உறிஞ்சும் இன்சுலினை கொடுப்பது உபயோகமாக இருக்கும்.

குடலுக்கு கோபம் வந்தால்…

(குடல் எரிச்சல் நோய்)

குடல் எரிச்சலின் அறிகுறிகள்

சாப்பிட்ட உடன் மலம் கழிக்க வேண்டிய உணர்வு.

தினமும் சுமார் ஏழு முதல் எட்டு தடவைகள் மலம் கழிக்க வேண்டிய நிலை.

சில சமயம் தண்ணீரைப்போல மலம் வெளியாகும்.

பகலில் மட்டுமே அடிக்கடி மலம் கழிக்கும் நிலை.

தூங்கிவிட்டால் மலம் கழிப்பது குறையும்.

அவ்வப்போது வயிற்றுவலி.

இதனால் வெளியில் செல்லவோ, முக்கிய நிகழ்ச்சிகளில் கலந்து கொள்ளவோ பயம்.

தீர்வுகள்

வயிறு ஸ்கேன் பரிசோதனை, குடலுக்கு கோலனோஸ்கோபி பரிசோதனைகளைச் செய்தால் அனைத்தும் இயல்பாகவே இருக்கும்.

மருந்துகள் கொடுத்தால் அவ்வப்போது பிரச்சினை குறையும்.

மருந்துகளை நிறுத்திவிட்டால் மீண்டும் அதே தொல்லை ஏற்படும்.

அதிக உடல் எடையைப் பற்றிய கேள்விகளும் பதில்களும்….

உருவம் பெரிதாக இருந்தால்தான் மற்றவர்கள் நம்மை மதிப்பார்கள்?

கற்கால மனிதனுக்குத்தான் மிருகங்களிடம் பயம் இருந்தது. இதற்கு பெரிய உருவம் தேவைப் பட்டது. இக்காலத்திற்கு அது தேவையில்லை.

அதிக எடை தானே உடல் ஆரோக்கியம்?

சராசரி எடையை மீறினால் உடலுக்கு கெடுதல்.

அதிகமாக சாப்பிட்டால்தான் அதிக சக்தி கிடைக்கும்?

அதிக அளவு உணவை ஜீரணிப்பதிலேயே சக்தி வீணாகிவிடும்.

உடல் குண்டாக இருப்பது தானே அழகு?

முப்பத்தைந்து வயதிற்குப் பின் பருமனாக இருந்தால் நாளடையில் அழகு போய்விடும்.

சத்தான உணவுகளை கணக்கின்றி எவ்வளவு வேண்டுமானாலும் சாப்பிடலாமா?

அளவிற்கு மிஞ்சினால் அமிர்தமும் நஞ்சாகும்.

என் பெற்றோர்கள் பருமனான உடல்வாகு கொண்ட வர்கள், அதனால்தானே நானும் பருத்து இருக்கிறேன்.

பரம்பரையியல்படி உடல் வாகு உண்டுதான். ஆனால் வேறு நோய்களில்லாதபோது சராசரி அளவு தான் உடல் எடை இருக்க வேண்டும்.

நான் எதுவுமே சாப்பிடுவதில்லை. இருந்தாலும் உடல் எடை கூடிக் கொண்டே வருகிறதே?

சாப்பிடுகிற அந்த குறைந்தபட்ச உணவிற்குத் தேவையான உடலுழைப்பு கொடுக்கவில்லை அல்லது மெடபாலிசம் செய்வதில் குறைபாடு உள்ளது என்பதாகும்.

காலை முதல் இரவு வரை வேலை செய்து கொண்டேதான் இருக்கிறேன். எனக்கு எதற்கு உடற்பயிற்சி?

உடற்பயிற்சி என்பது எல்லா தசைகளுக்கும் பயிற்சி கொடுப்பது. மூளை வேலையோ வீட்டில் செய்யும் சிறுசிறு வேளைகளோ போதாது. தொடர்ச்சியாக  குறைந்தது 30 நிமிடங்கள் செய்யும் உடற்பயிற்சி தான் சரியானதாக  இருக்கும்.

எனக்கு சிறுநீர் அதிகமாகப் போவதில்லை. எனக்கு நீர் உடம்பு, உடலில் கெட்ட நீர் சேர்ந்து விட்டது. அதனால் பருத்துவிட்டதா?

நீர் என்றால் அதுவும் ஒரு நோய்தான். அதை சரி செய்ய வேண்டும்.

எனக்கு அதிகமாக சாப்பிட விருப்பமில்லை. நண்பர்கள், உறவினர்கள், வற்புறுத்தலினால் அதிகமாக சாப்பிடுகிறேன். என்ன செய்வது?

மற்றவர்கள் வற்புறுத்தினாலும் சாப்பிடுவது நாம்தான். அதைக் கட்டுப்படுத்துவது நம் பொறுப்பு.

எனக்கு ஹார்மோன் பிரச்சினைகளால் உடல் பருத்து விட்டது. அதற்கு வழி?

உடல் பருத்தவர்களில் மிகக் குறைந்த சதத்தினருக்கே ஹார்மோன்  பிரச்சனை உள்ளது.

எனக்கு உடற்பயிற்சிக்கு நேரமே கிடையாது. வயிறு திருப்தியாக சாப்பிடுவதை குறைக்கவோ முடியாது. ஏதாவது ஒரு மாத்திரைபோட்டு குறைத்துவிட முடியுமா?

மாத்திரை சாப்பிட்டாலும உணவில் கட்டுப் பாடும், உடற்பயிற்சியும் அவசியம் தேவை.

நான் பிரபலமானவன். அதனால் வெளியில்  சென்று நடந்து செல்லுதல் போன்ற பயிற்சிகளை செய்ய முடியாது. மாற்று வழி என்ன?

வெளியில் செல்லாதவர்கள் வீட்டிலேயே  டிரட்மில் பயிற்சிகளைச் செய்யலாம். வீட்டிற் குள்ளேயே சைக்கிள் ஓட்டும் பயிற்சி களையும் செய்யலாம்.

அரிசி சாதம் சாப்பிடாமல் சப்பாத்தியை மட்டுமே சாப்பிட்டு உடல் எடையைக் குறைக்க முடியுமா?

எதைச் சாப்பிட்டாலும் நாம் சாப்பிடுகின்ற கலோரிகளின் அளவை பொறுத்துதான் எடை கூடுகிறது.

நெய் சாப்பிடாமல் சூரிய காந்தி எண்ணெய் மற்றும் நல்லெண்ணைய் பயன்படுத்தினால் உடல் எடை குறையுமா?

சூரியகாந்தி எண்ணெய் மற்றும் நல்லெண்ணெய் நல்லதுதான். ஆனால் எந்தப் பொருளையும் எண்ணெயால் வறுத்து சாப்பிடக்கூடாது.

மாமிச உணவுகளை சாப்பிடாமல் உடல் எடையை குறைக்க முடியுமா?

சைவ உணவுகளையே அதிகமாக சாப்பிட்டாலும் உடல் பருக்கும்

பகலில் தூங்கும் பழக்கத்தால்தானே உடல் பருத்து விடுகிறது?

உடலில் தேவைக்கு அதிகமான உணவினாலேயே பருக்கிறது.

யோகாசனம் செய்தால் உடல் இளைக்குமா?

யோகாசனம் நல்ல பயிற்சியே. அத்துடன் உணவுக் கட்டுப்பாடும் உடற்பயிற்சியும் இருந்தால் தான் உடல் எடை குறையும்.

டாக்டர்கள் உடல் எடையை குறைக்க உப்பு சப்பில்லாத உணவையே வலியுறுத்துகிறார்கள். அது சரியா?

சுவையான உணவு பழக்கத்துடனே சாப்பிடுகின்ற அளவை மாற்றி உண்பதால் உடல் எடையைக் குறைக்கலாம்.

எடையைக் குறைத்தாலும் பிறகு சில மாதங் களில் பருத்துவிடுமோ?

எப்போதும் உணவு கட்டுப்பாடுகளைக் கடைப்பிடித்து குறைந்த பட்ச உடற்பயிற்சியாவது செய்தால் உடல் பருக்காது.

உடற்பயிற்சி செய்து உடலை வருத்தினால் உடம்பு தாங்காதே?

உடற்பயிற்சி உடலை வருத்துவது அல்ல. உடலுக்கு அலைச்சலும் அல்ல. ஒவ்வொருவருடைய இதயத்தின் செயல் பாட்டிற்கேற்ப பயிற்சியை மருத்துவரின் ஆலோசனையுடன் அவசியம் செய்ய வேண்டும்.

அதிக எடையால் மகிழ்ச்சி குறையுமா?

அதிக எடையால் சிறுவயதினருக்கு மகிழ்ச்சியின்மை, தாழ்வு மனப்பான்மை, தன்னம்பிக்கை குறைவு, மனச்சோர்வு போன்ற பிரச்சனைகள் ஏற்படும்.

பகலில் சாப்பிட்டுத் தூங்கினால் உடல் பருக்குமா?

சாப்பிட்டு தூங்குவதால் உடல் பருமனாவ தில்லை. அளவிற்கதிகமான அளவில் உணவை உள்ளே செலுத்துகிற பாரத்தால் தூக்கம் ஏற்படுகிறது. அதனால் உடல் பருக்கிறது.

 

குழந்தையின் மூளை வளர்ச்சி

முதல் மாதத்தில் : சத்தம் வரும் பக்கம் தலையைத் திருப்பும்

இரண்டாவது மாதத்தில்: மற்றவர்களைப் பார்த்து சிரிக்கும்.

மூன்றாவது மாதத்தில்: தலை ஆடாமல் நிற்கும். தாயைத் தெரிந்து கொள்ளும். சத்தங்களை எழுப்பும்.

ஐந்தாவது மாதத்தில்: நன்றாகப் புரளும். மற்றவர்களுடைய உதவியுடன் உட்கார முடியும்.

ஆறாவது மாதத்தில்: தன் உருவத்தைக் கண்ணாடியில் பார்த்துச் சிரிக்கும். ‘மா’, ‘பா’ போன்றஓர் எழுத்து ஒலிகளை எழுப்பும்.

ஏழாவது மாதத்தில்: மற்றவர்களுடைய உதவி இல்லாமல் உட்காரும்.

எட்டாவது மாதத்தில் தவழும்.

ஒன்பதாவது மாதத்தில்: மற்றவர்கள் உதவியுடன் நிற்கும் ‘மாமா’, ‘பாபா’ போன்ற இரண்டு எழுத்து சொற்களைச் சொல்லும் ‘டாட்டா’ சொல்லும்.

பத்தாவது மாதத்தில்: மற்றவர்கள் உதவியுடன் தளர்நடை நடக்கும்.

பன்னிரண்டாவது மாதத்தில்: மற்றவர்களுடைய உதவி இல்லாமல் நிற்கும் அர்த்தம் தரும் இரண்டு வார்த்தைகளைச் சொல்லும்.

பதிமூன்றாவது மாதத்தில்:மற்றவர்களுடைய உதவி இல்லாமல் நடக்கும்.

இருபத்து நான்காவது மாதத்தில்: மாடிப்படி ஏறும். சிறு வாக்கியங்களைப் பேசும்.

முப்பத்தி ஆறாவது மாதத்தில்: மூன்று சக்கர சைக்கிள் ஓட்டும்.

உங்களின் கேட்கும் திறன் எப்படி?

1.                            தொலைபேசியில் எதிர்முனையில்                               இருப்போரின்          பேச்சைக் கேட்க                               சிரமப்படுகிறீர்களா?

2. ஒரே சமயத்தில் இரண்டு அல்லது அதற்கு                         மேற்பட்டவர்கள் பேசும்போது அந்த                                 உரையாடலை புரிவதில் பண்ணுவதில் சிரமம்                 இருக்கிறதா?

3. டி.வி – யில் ஒலி அளவை அதிகம் வைத்துக்     கேட்கிறீர்கள் என்று யாராவது புகார்                              சொல்கிறார்களா?

4.            அடுத்தவர்களுடனான உரையாடல்களைச்          சிரமப்பட்டுத்தான் புரிந்து கொள்கிறீர்களா?

5.            டெலிபோன் அல்லது காலிங்பெல் சத்தம்                               உங்களுக்குக் கேட்பதில்லையா?

6. சத்தமான இடங்களில் உரையாடல்களைக்                     கேட்பதில் கஷ்டம் இருக்கிறதா?

7.            சத்தம் எங்கிருந்து வருகிறது என்று குழப்பம்      அடைகிறீர்களா?

8. சில வார்த்தைகள் புரியாமல் அதைத் திரும்ப                 இன்னொரு தடவை சொல்லும்படி                 கேட்கிறீர்களா?

9.            குழந்தைகளின் பேச்சுக்கும் பெண்களின்                                 பேச்சுக்கும் வித்தியாசம் காண கஷ்டப்                            படுகிறீர்களா?

10.சத்தம் மிகுந்த இடத்தில் வேலை                                                 செய்கிறீர்களா?

11.          உங்களிடம் பேசுபவர்கள் தெளிவில்லாமல்        முணுமுணுப்பதாக தோன்றுகிறதா?

12.          பேசுவதைத் தப்பாக புரிந்து கொள்வதாக                 அடுத்தவர்கள் உங்கள் மீது எரிச்சலடை                              கிறார்களா?

13.          அடுத்தவர்களின் உரையாடலுக்குத் தப்பாக         செயல் பண்ணுவதாக உணர்கிறீர்களா?

14. காது சரியாக கேட்காததால், சரியாக புரிந்து கொள்ள முடிவதில்லை என்று பொது நிகழ்ச்சி        களில் கலந்து கொள்வதைத்  தவிர்க்கிறீர்களா?

15. இவருக்குக் காது சரியாக கேட்பதில்லை என்று        உடன் இருப்பவர்கள் நினைக்கிறார்களா?

பதினைந்து கேள்விகளுக்கும் பதில் சொல்லி ஆயிற்றா? உங்களது மதிப்பெண் 0 விலிருந்து 5 ஆக இருக்கும் பட்சத்தில் உங்களது கேட்கும் திறன் அபாரமாக இருக்கிறது. காது பற்றிய கவலையையே விட்டுவிடலாம்

6-லிருந்து 9-ஆக இருந்தால் காது, மூக்கு, தொண்டை நிபுணரை நீங்கள் பார்ப்பது நல்லது.

10க்கும் மேல் இருந்தால் காது பாதிப்பு உறுதி எனலாம்.

இந்த மாத இதழை EBook வடிவத்தில் படிக்க – Click

நட்பும் மகிழ்ச்சியும்

பிரெஞ்சு மருத்துவர் ஆல்பர்ட் ஸ்வைட்சரின் கருத்தின்படி ==உங்கள் விதி எப்படியிருக்கும் என்று எனக்கு தெரியாது. ஆனால் நான் அறிந்தது என்னவென்றால் உங்களில் யாரெல்லாம் மற்றவரை தேடிப்போய் சேவை புரிகின்றீர்களோ அவர்களே மகிழ்ச்சியுடன் இருப்பீர்கள்++.

வெறுமனே நன்றியுணர்வு கொண்டால் மட்டுமே நாம் பெற்றதை திருப்பிக் கொடுத்தல் போலாகாது. பொருளால் (சேவை செய்தே) மட்டுமே நன்றிக் கடன் செலுத்த முடியும்.

தன்னார்வத்துடன் சேவை புரிய முனைவதால் மற்றவர்க்கு உதவ உங்களுக்கு ஒரு வாய்ப்பு கிடைப்பது மட்டுமன்றி, உங்களுக்கு உதவியோருக்கு நன்றிக் கடன் செலுத்தவும் முடியும்.

நட்பை வளர்த்துக் கொள்வது என்பது உங்கள் வாழ்க்கையில் மகிழ்ச்சியும், சந்தோஷத்தையும் காண்பதற்கான நிச்சயமான வழி., பெரிய நண்பர் வட்டம் மற்றும் குடும்பம் உள்ளோர் அதிகம் சிரிக்கின்றனர். குறைவாக கவலைப்படுகின்றனர்.

மேலும் நீண்ட நாட்கள் வாழ்கின்றனர் என்று சமீபத்திய ஆய்வுகள் கூறுகின்றன.

ஒரு தத்துவ ஞானி பல நூற்றாண்டுகளுக்கு முன் எழுதியது. உலகில் நட்பை விட விலை மதிப்புள்ளது வேறு எதுவும் இல்லை. தங்கள் வாழ்க்கையிலிருந்து நட்பை ஒழித்து விட்டவர்கள் பூமியிலிருந்து ஆதவனைப் பிரித்து விட்டது போலாகும். ஏனென்றால், இயற்கை தந்த பரிசுகளில் இதுவே மிக அழகானதும் மகிழ்ச்சி தருவதும் ஆகும்.

இந்த மாத இதழை EBook வடிவத்தில் படிக்க – Click

நல்ல மருத்துவம்

நவீன மருத்துவம் வாழ்க்கைத் தரத்தை மிகவும் உயர்த்தி விட்டது. யாரும் மறுக்க முடியாது. அதே சமயம் நமது பழக்க வழக்கங்களும், உணவுகளும் உடல் நலத்தில் அதிக பங்கு வகிப்பதை மறக்கக்கூடாது.

குழந்தைகளுக்கு பால் சிறந்த உணவு. குழந்தைகளுக்கு தாய்ப்பாலே மிகவும் சத்தானது. நோயிலிருந்து காப்பது. அதுவே பெரியவர் களுக்கு அதிக கொழுப்பை உண்டாக்குவது. கொழுப்பை நீக்கிய பாலையே பெரியவர்கள் அருந்தலாம்.

உணவுகளில் பழங்கள், கீரைகள், காய்கறிகள் மிக அவசியமானவை. உடலுக்குத் தேவையான வைட்டமின்கள் மற்றும் தாதுக்களைக் கொடுப்பது. முக்கியமாக மலச்சிக்கலை குணப்படுத்தி மூல நோயைத் தவிர்ப்பது. மேலும் உடலை பருக்காமல் செய்ய உதவுவது இவ்வுணவுகள்தான்.

மாமிச உணவுகளில் மீன் மற்றும் கடல் உணவுகள் ஜீரண மண்டலத்தில் எளிதாக சீரணிக்கப்படுகின்றன. பிற மாமிச உணவுகளால் கொழுப்பு சத்து அதிகமாகுதல், அதிக அளவில் சீரண நோய்கள் ஏற்படுதல் போன்ற சிக்கல்கள் அதிகம்.

வலி மாத்திரை களை அதிகமாக சாப்பிடுவதைவிட முறையான ஓய்வு, உடற் பயிற்சிகள், யோக பயிற்சிகள் போன்றவற்றின் மூலம் உடல் வலிகளை வெகுவாக குறைக்க முடியும்.

வைட்டமின் மாத்திரைகளை கட்டாயமாக சாப்பிட வேண்டும் என்பதில்லை. ஏதாவது குறைபாடு உள்ளவர்களைத் தவிர மற்றவர்கள் பழங்கள், கீரைகளை அதிகமாக சாப்பிட்டாலே போதுமானது.

நாள்தோறும் யோக பயிற்சி செய்தால் உடலின் எல்லா உறுப்புகளும் சமநிலையில் செயல்படும்.

இந்த மாத இதழை EBook வடிவத்தில் படிக்க – Click

Advertisements